السلام عليكم النهاردة هنتكلم على موضوع مهم جدا بتهتم بية كل الستات وهو (حفظ الخضروات)
طبعا كلنا اكيد بنشتاق لاكلة معينة فى غير ميعادها يعنى مثلا نشتاق للملوخية فى الشتا ونشتاق للقلقاس فى الصيف
دلوقتى مش هيبقى فى مشكلة ان شاء الله وهنبتدى نعرف ازاى نحفظ كل الخضروات خطوة خطوة
اولا:البطاطس
ساعات نلاقى البطاطس رخيصة وساعات تبقى غالية لما تبقى رخيصة هاتى كمية واعمليها كالتالى
نقشر البطاطس ونقطعها صوابع ونغسلها كويس اوى بعد كدة نغلى شوية ماية ونحط فيها شوية خل ونحط فيها البطاطس واول ماتغلى نقفل عليها ونسيبها شوية فى المصفة لغاية ماتتصفى كويس اوى وبعد كدة نحطها فى اكياس ونشيلها فى الفريزر كل كيس على اد اكلتنا وبعد مانطلعها نسخن الزيت كويس ونحطها فية لحد ماتحمر وبالهنا والشفا
ثانيا:القلقاس
نجيب القلقاس ونقطعة مكعبات وننقعة فى ماية سخنة لمدة ربع ساعة عشان المادة اللزجة اللى فية تطلع ونفضل نغسل فى كويس لحد ماتبقى المية بتاعتة نضيفة بعد كدة نصفية فى المصفة كويس وبعدين نحطة فى اكياس ونشيلة فى الفريزر وطبعا مننساش السلق وازاى بقى هنعملة
اولا هنجيبة ونقطفة ونغسلة كويس ونحطة ع النار مع الثوم ومعلقتين سمن ونقلب فية كويس لحد ماينشف بعد كدة نحطة فالخلاط مع شوية شوربة ونضربهم كويس ونشيلة فى اكياس كل كيس على اد القلقاس اللى هنعملو
ثالثا: السبانخ
تجيبى السبانخ وتقطعيها وتغسليها كويس اوى وبعدين نسيبها تتصفى كويس لحد ماتتهوى وبعدين نحطها فى اكياس ونشيلها فى الفريزر
رابعا : البسلة
نجيب البسلة ونفصصها ونقطع الجزر عليها وبعدين نغسلهم كويس اوى وبعد كدة نغلى ماية ونحطهم يغلو غلوتين فى المية وبعد كدة نجيب ماية ساقعة متلجة ونحطها فيها وبعدين نسيبها تتصفى كويس ونحطها فى اكياس وع الفريزر عدل
خامسا : الملوخية
نجيب الملوخية ونغسلها كويس اوى وبعدين نفردها على طرحة نضيفة او فوطة نضيفة لحد متتشرب المية اللى فيها وبعدين نخرطها كويس بالمخرطة وبعديننجيب 2مكعب وندوبهم فى مية ونرفعهم ع النار ونحط فيها الملوخية لحد ماتفك وبعدكدة نحط شوية بيكربونات اللى هى (كربناتو )من العطار ونسيبها تبرد ونحطها فى اكياس وفى الفريزر
سادسا : البامية
نجيب البامية ونقمعها ونغسلها كويس ونجيب شوية مية فى حلة ونغليهم ونحط البامية فيها لمدة خمس دقائق وبعد كدة نجيب مية ساقعة ونحطها فيها ونسيبها تتصفى فى المصفة كويس وبعدين نحطها فى اكياس ونشيلها فى الفريزر
سابعا : الفاصوليا الخضراء
نفس طريقة البامية السابق ذكرها
وتستعمل مجمدة عند الطبخ حتى تحتفظ بالفيتامينات بتاعتها
ثامنا : ورق العنب
لحفظ ورق العنب هاتى الورق العنب ورصية فوق بعضة من غير متغسلية وحطية فى الفريزر وعند الطبخ حطى مية سخنة فى حلة وفيها ملح وكمون وسبية يغلى ربع ساعة وبعدين افتحى علية المية تحت الحنفية وصفية واحشية وبالهنا والشفا
تاسعا :الكرنب
نجيب الكرنبة ونشيل راسها ونغسلها كويس وبعدين نغلى مية حاطين فيها ملح وكمون وشوية زيت ونسلقة نص سلقة ونسيبة فى المصفى يتهوى وبعدين نقطعة على حسب رغبتنا ونشيلة فى اكياس فى الفريزر ولما نيجى نعملة نخرجة ونسيبة لحد مايفك وبعدين نحشية
عاشرا:القرنبيط
نجيب القرنبيطة ونقطعها ونجيب مية فى حلة ونسيبها لغاية متغلى وبعدين نحط القرنبيط يغلى غلوة واحدة بس ونصفية ونشيلة فى الفريزر وفى ناس بتشيلة نى وتسوية بعد متخرجة من الفريزر الطريقتين صح
وبكدة نبقى اتكلمنا عن حفظ جميع الخضروات وبالهنا والشفا
0 coment�rios:
إرسال تعليق